Currículum

Xa desde moi pequeno as bolboretas andaban a bulir pola súa cabeza, polo seu corazón infante, pola súa imaxinación e amosaba unhas inquietudes especiais que xa deixaban entrever esa futura alma de artista. Pintaba todo o que caía nas súas mans, desde un ovo, ata as paredes do cuarto, pinturas xa cunha forte pegada creativa. Dicía súa nai que cando pintaba os ovos non sabía que facer con eles, se comelos ou deixalos así, porque daba moita mágoa rompelos. Empezou os seus primeiros estudios no Colexio da Milagrosa e xa por aqueles tempos a monxa tiña que vixialo, porque pintaba os pantalóns dos rapaces, os seus e o mobiliario da súa clase. Foi logo ós Maristas, colexio no que pasou oito anos e onde gañou o seu primeiro premio de carteis, que levaba por título "Maristas, cen anos en España". Aquí coñece ó seu amigo da alma, Luis Tosar, e a outros moitos cos que compartía a súa forma de pensar e de ve-la vida. Dos Maristas pasou ó Instituto Feminino, onde fixo a súa primeira exposición individual, para acabar sendo delineante, profesión que compaxinaba perfectamente coa pintura e na que podía amosa-las súas dotes creativas.