Currículum

Licenciado en Dereito e en Ciencias Políticas e Económicas. Doutor en Dereito, con premio extraordinario, igual que na licenciatura. En 1945 ingresou, por oposición, co número un da súa promoción, no Corpo de Letrados das Cortes Españolas; dous anos máis tarde ingresou na Escola Diplomática, tamén co número un. En 1948 obtivo a Cátedra de Dereito Político da Universidade de Valencia e, en 1953, trasladouse á de Teoría do Estado e Dereito Constitucional da Universidade Complutense. Ingresou en política en 1951 como secretario xeral do Instituto de Cultura Hispánica; despois foi secretario xeral do Consello Nacional de Educación (1953); secretario xeral técnico do Ministerio de Educación (1955-58), secretario da Comisión de Asuntos Exteriores das Cortes (1958-62), e director do Instituto de Estudios Políticos (1961). Entre 1962 e 1969, Manuel Fraga dirixiu o Ministerio de Información e Turismo. Tamén foi embaixador en Londres (1973-75); vicepresidente do Goberno para Asuntos do Interior e Ministro da Gobernación do primeiro Goberno da Monarquía (1975-76); e membro da comisión encargada da redacción da Constitución española de 1978. Foi deputado nacional e europarlamentario. Foi presidente da Xunta de Galicia desde 1990 ata 2005. Foi senador ata 2011.