Currículum

Estudiou o bacharelato en Ourense, onde fundou e dirixiu "Posío", revista literaria recentemente editada facsimilarmente pola Xunta de Galicia. Foi discípulo de Vicente Risco. Estudiou Letras en Santiago, que acabou en Madrid en 1946. Doutor en Filoloxía Románica pola Universidade Complutense de Madrid (1948), Dr. Phil. pola de Colonia (Alemaña, 1956) e Doutor Honoris Causa pola Universidad Nacional del Sur (Arxentina, 1997). Actualmente é catedrático emérito da Universidade Complutense de Madrid (desde 1989) e catedrático en activo da University of Texas en Austin (desde 1990). Foi lector de español na Universidade de Colonia, secretario xeral do Instituto de España en Munich (1956 e 1957)e catedrático de Literatura Española (La Laguna, Valladolid e Madrid), foi decano de Filosofía e Letras (La Laguna), de Ciencias da Información (Madrid), secretario xeral da Universidade Internacional de Canarias (As Palmas), vicerrector da Universidade Complutense (Madrid), Gastprofessor das Universidades de Colonia, Innsbruck e Salzburg e visiting professor (California, Virxinia e Texas).