Obras realizadas

Comprometido coa recuperación do patrimonio musical galego, presenta en decembro de 2012 “Guitarra Clásica Galega”, traballo discográfico baixo o selo “Ouvirmos” e o apoio da Axencia Galega das Industrias Culturais e a Secretaría Xeral de Cultura da Xunta de Galicia. “Guitarra Clásica Galega” fai un percorrido polo pasado, presente e futuro do instrumento na nosa cultura, coa recuperación de obras inéditas como a “Pastoral” para guitarra de Jesús Bal y Gay, a colección de valses “Violetas” de José Fernández Vide, ou a comisión do “Nocturnal (Bal y Gay)” ao compositor compostelán Fernando Buide, un canto á guitarra galega que inexplicablemente non fora formulado ata o de agora. Segundo o musicólogo Leopoldo Neri: "este crisol caleidoscópico de pezas para guitarra, tan esplendidamente interpretadas polo tudense Samuel Diz, desvélanos un íntimo e sensual espazo da historia musical galega e, á vez, o vigor compositivo dos nosos días”.