Obras realizadas

En 1997 realizou un curso de posgrao sobre a realización de documentais do que sae Kompostela, capital bravú, codirixido con Basilio Martín Patino e outros autores, e que resulta finalista nos premios AGAPI na sección de documentais. Ó longo da súa carreira fixo unha gran cantidade de reportaxes e documentais que se emitiron por televisión (La Primera, La 2, Canal Internacional, Grandes Documentales Hispasat, Canales Temáticos, 24 Horas, Euronews, etc.) colaborando en distintas áreas e destacando como director de fotografía. O documental Naviegos, os outros arraianos, no que fai de director de fotografía, guionista e director, é o traballo máis persoal xa que parte das súas vivencias infantís en torno á vila natal nas ribeiras do río Navia. Entre os seus documentais máis importantes podemos destacar: Segura Torrella, paisaxe e paisanaxe (1990), viaxe pola obra dun dos mellores e máis esquecidos pintores galegos do século XX; Kompostela, capital bravú (1997), a capital de Galicia vista con outros ollos, outra Compostela á marxe da oficialidade, e Naviegos, os outros arraianos (2001), unha visión subxectiva do río Navia no que o autor busca os fantasmas do pasado, as súas raíces.