Currículum

Monseñor Antonio Peteiro Freire ingresou no Seminario franciscano de Herbón en 1949. Alí estudou cinco anos de Bacharelato. Tomou o hábito o 20 de agosto de 1954. Fixo o noviciado no convento de San Francisco de Santiago. Alí emitiu a profesión simple o 21 de agosto de 1955.
Estudou os dous primeiros anos de Filosofía no convento de San Diego de Canedo, en Ponteareas, e o terceiro no convento de Santiago. Estudou Teoloxía na Universidade Pontificia de Salamanca, onde se licenciou en 1962. Nese mesmo ano, o 5 de agosto, ordenouse sacerdote.
Desde 1962 a 1964 estudou Pedagoxía en Roma e logo trasladouse a Munich (Alemaña) para ampliar os seus estudos de Teoloxía ata1966. En 1967, en Lyon (Francia) presentou e defendeu a tese doutoral sobre o pecado e o home actual.
Desde 1967 ensinou Teoloxía Dogmática, primeiro no Teologado Franciscano e, desde 1969 a 1983, no Centro de Estudos da Igrexa en Santiago, hoxe Instituto Teolóxico Compostelán. Durante varios cursos ensinou Deontoloxía médica na Facultade de Medicina da Universidade Compostelá.
Na provincia exerceu os cargos de Definidor Provincial, Mestre de Profesos temporais e asistente provincial da Orde Franciscana Segrar. En 1970, fundou, xunto con outros relixiosos da fraternidade franciscana de Santiago, o Centro Cultural Juan XXIII, obra de promoción social, e un albergue nocturno para transeúntes.
En 1971 foi nomeado membro do Presbiterio da Diocese de Santiago, en representación dos relixiosos da zona de Santiago. Foi un dos promotores del Concilio Pastoral de Galicia, que se celebrou de 1973 a 1979. Durante os traballos deste Concilio Fr. Antonio Peteiro foi membro da Comisión Coordinadora, en representación dos relixiosos.
En 1983 foi nomeado Arcebispo de Tánxer e a súa consagración tivo lugar na igrexa conventual de San Francisco de Santiago de Compostela o 24 de setembro de 1983 co lema episcopal “In verbo tuo laxabo rete”. Exerceu o servizo de Pastor da igrexa de Tánxer ata o ano 2005 en que a enfermidade o obrigou a deixar o cargo a disposición da Santa Sede.