Currículum

Economista pola Universidade de Santiago de Compostela, sociólogo pola Universidade de París VIII-Vincennes. Ampliou estudios (con bolsa de estudios do goberno francés) en Socioloxía, como "stagiaire", con Pierre Bourdieu na Ecoles des Hautes Etudes en Sciences Sociales (EHESS), París. Seguiu en París os cursos de Michael Foucault (Collège de France), Roland Barthes (EHESS e College de France), Alain Touraine (EHESS) e Gilles Deleuze (Universidade de París VIII-Vincennes). É profesor de Socioloxía na Facultade de Ciencias Económicas e Empresariais de Santiago de Compostela, desde o ano 1973, onde actualmente (xuño 2000) imparte as disciplinas de Socioloxía xeral, Socioloxía da empresa e Socioeconomía dos movementos sociais (disciplina que propuxo para o plan novo de estudios e que foi aceptada). Desde os anos 60 veu participando en movementos sociais galegos, españois e internacionais e creando colectivos, coordinadoras (algúns de repercusión internacional)... de intervención social, co fin de tratar de coñecerse e vivir e xogar mellor individual e socialmente. Desde os anos 70 ven colaborando en diferentes medios de comunicación (prensa, revistas xerais e especializadas, radio, televisión, etc...) galegos e españois. Foi coordinador do Foro da Universidade de Santiago de Compostela (para os campus de Lugo e Santiago) e, en calidade de tal e de profesor, desde os anos 70 veu organizando conferencias, coloquios, xornadas, debates... para vincular activamente a Universidade coa realidade social, actividades nas que participaron máis de 250 expertos, responsables públicos e privados de Galicia, España e outros países...