Currículum

Leva dende os 20 anos dedicándose á pintura. Despois de pasar por Artes e Oficios, aprendeu as diferentes técnicas pictóricas de mans de pintores como os seus pais (Fernando Quesada e Ana Legido) e Antonio Quesada, co que estivo uns meses no seu estudio e do que aprendeu que non era tan fácil poder pintar e gaña-la vida con iso.
Con moita curiosidade marchou ó sur a aprender outras técnicas como a da súa irmá Marieta Quesada en Córdoba, que o acolleu no seu estudio por un período de case un ano. Despois destas colaboracións de aprendiz-mestre instálase nun estudio en Córdoba, combina o pintar con dar clases de pintura. Nun principio amósase reticente a expoñer pero, despois de pintar un mural de 6x20 metros en Ferrol co seu tío Jaime Quesada en medio dunha praza, decide facer a súa primeira exposición colectiva e quita-lo medo a expoñer. Cambia o seu estudio a Granada, onde sigue vivindo.