Obras realizadas

En 1999 edita o seu primeiro disco “Susana Seivane” (BOA MUSIC), producido por Rodrigo Romaní, un dos membros fundadores de Milladoiro. Este traballo, baseado en temas tradicionais e composicións de artistas galegos, lévaa polos mellores escenarios de folk nacional e internacional, conseguindo grandes éxitos e loables críticas. O seu primeiro disco edítase xa en Europa, EE.UU. e Canadá. Co seu segundo traballo “Alma de Buxo” (BOA MUSIC, 2001), producido por ela mesma, baixo o asesoramento artístico de Rodrigo Romaní, consolídase como artista galega de referencia no folk. Neste disco colaboran artistas da importancia de Uxía Senlle, Kepa Junquera ou Rodrigo Romaní, entre outros. Merece especial mención a colaboración do seu avó Xosé Manuel Seivane. Como novidade, neste traballo introduce xa instrumentos como a batería ou o baixo eléctrico e enriquece o disco con composicións propias. Co suxestivo título de “Mares de Tempo” ve a luz o seu terceiro traballo, nunha traxectoria imparable que a leva polos mellores escenarios de Escocia, Alemaña, Francia, Italia, Estados Unidos, Arxentina, etc. A innovación dos arranxos e o coidado na selección dos temas é un proxecto para o que quixo rodearse dos músicos da súa banda de sempre, ademais da colaboración de recoñecidos intérpretes como Roberto Somoza (saxos), Carlos Castro (percusións), Xavier Cedrón (violín), Viascón (serra e trompeta), Xavier Paxariño (frautas e clarinetes), Guadi Galego (voz) e o colectivo de música tradicional da Coruña Ruote, Xavier Gastañaduy (guitarra), sen esquecer que está sendo un apoio de luxo na súa carreira e que tamén colabora coa arpa e o seu talento de compositor Rodrigo Romaní.