Obras realizadas

Vicepresidenta da Asociación de Amas de Casa "Lucus" na súa fundación.

1980-1984: Vogal de UNICEF de Lugo.

1984-1989: Presidenta Provincial de UNICEF (deixou esta organización para integrarse na política, concorrendo ás eleccións lexislativas de 1989). Con posterioridade, faise cargo da Dirección das Aulas da Terceira Idade (Educación Permanente e Tempo Libre). Vicepresidenta da Alianza Francesa. Presidenta do distrito segundo, que organizou as bases para as eleccións municipais de 1991, ás que concorre saíndo elixida concelleira. Ó mesmo tempo noméana vogal de Servizos Sociais da FEMP. Delegada local da Fundación Cánovas del Castillo. Nas eleccións municipais de 1995 sae novamente elixida concelleira e pasa a ser Cuarto Tenente de Alcalde. Ademais, é nomeada presidenta da Comisión da Muller na FEMP e con tal motivo representa a España a través do CCMRE en diferentes foros europeos (París, Londres, La Haya, Sintra, Bruxelas e Sofía). Vicepresidenta 3ª da Comisión Nacional da Muller. Concorre de novo como candidata en 1999 ás eleccións municipais, obtendo a maioría simple (12 de 25), pero ó pactar PSOE e BNG (7+6) queda na oposición. Foi invitada como relatora de conferencias en Málaga, Santander, Tarancón, Torrelavega, Xixón, Palencia, etc... e contribuíu con relatorios, recollidas nun libro da Fundación Dolores Ibarruri " Mujeres en los Poderes Locales". Xa na oposición, en decembro de 1999, funda e preside a Asociación Veciñal "Parque de Rosalía de Castro de Lugo" con douscentos oitenta afiliados. No mes de maio do ano 2000 fúndase a Asociación Sociocultural de Formación e Emprego "ASFEM", sen ánimo de lucro, que ten como fin favorecer a inserción social de colectivos desfavorecidos, a formación ocupacional, o acceso a novas tecnoloxías, promover políticas de igualdade, actividades de inserción sociolaboral, actividades de animación sociocultural e voluntariado. Desta asociación é elixida presidenta. En novembro de 2000 foi nomeada presidenta da Comisión Nacional de Consumo. En xaneiro de 2001, funda e preside a Asociación de Consumidores e Usuarios en Marcha "Conumar", sen ánimo de lucro, con mil vintecinco asociados e con oficina aberta como punto de información ó consumidor. O día 11 de xullo de 2001 funda en Lugo a Asociación de Familias e Mulleres Rurais "AFAMMER". Na Asemblea Nacional Ordinaria da Asociación de Familias e Mulleres do Medio Rural "AFAMMER" foi designada presidenta rexional de Galicia, celebrada en Cidade Real no mes de xaneiro. En febreiro de 2001 pasa a formar parte da xunta directiva provincial da UDP (Unión de Pensionistas e Xubilados), composta por dezanove asociacións da provincia de Lugo. Con data 21 de marzo de 2001 é nomeada vogal do Consello Rexional das Persoas Maiores (DOG nº 57 de 21.03.2001). Como membro deste Consello ostentou a condición de “delegada electa”, en representación da Comunidade Autónoma de Galicia no II Congreso Estatal das Persoas Maiores, que se celebrou en Madrid do 21 ó 23 de xuño de 2001. Por resolución da Consellería de Sanidade e Servizos Sociais de data 1 de xuño (DOG nº 115 de 14.06.01), pasa a formar parte da Comisión Permanente do Consello Galego das Persoas Maiores. Regularmente realizou colaboracións xornalísticas sobre temas sociais e muller, co diario local El Progreso e La Voz de Galicia da Coruña. Na actualidade preside distintas asociacións non gobernamentais: Asociación para o Desenvolvemento Sociocultural, Formación e Emprego (ASFEM) de ámbito estatal, Asociación de Familias e Mulleres do Medio Rural de Galicia (AFAMMER Galicia) de ámbito autonómico, a Asociación de Consumidores e Usuarios en Marcha (CONUMAR) e a Federación GALICECAN para a Igualdade de Oportunidades.

En abril de 2010, a Federación de Autónomos de Galicia (Feaga) nomeouna "Autónoma del Año".

En 2014, a Xunta de Galicia, concedeulle a Medalla Castelao.