Currículum

Arturo Souto mostrou a súa afección pola pintura xa desde neno ó lado do seu pai, pintor afeccionado, e foi en 1920 cando ó trasladarse coa súa familia a Sevilla consolidou a súa vocación, entrando en contacto con outros artistas andaluces. En 1922 foi a Madrid e ingresou na Academia de Belas Artes de San Fernando e tres anos máis tarde realizou a súa primeira exposición. Gracias ós cartos conseguidos coa venta dalgúns dos seus cadros conseguiu viaxar por primeira vez a París en 1926 e dous anos máis tarde viaxou alí de novo gracias a unha bolsa da Deputación de Pontevedra. Posteriormente regresou a Madrid e participou na Exposición Colectiva de Arte Galego (1928) e nas exposicións individuais no Ateneo (1929) e no Lyceum Club 1930). Por esta época reiniciou os seus contactos con Galicia e foi en 1930, a través do seu amigo o poeta Luis Pimentel, cando entrou en contacto co grupo de intelectuais de Lugo. Antes da Guerra Civil realizou importantes mostras en Madrid, Bilbao, Copenhague e Berlín (1932), Madrid e Galicia (1933) e Barcelona e Florencia (1934). Tras recibi-lo premio "Roma" en 1934, trasladouse a Italia para perfecciona-los seus estudios. Como debuxante gráfico, colaborou nas revistas El Combatiente, Madrid, El mono azul e Nova Galiza. Tras abandonar Europa, viaxou primeiro á Habana, onde levou a cabo unha exposición con gran éxito. Posteriormente viaxou a Estados Unidos, onde tamén realizou varias exposicións e en 1942 trasladouse a México, onde se instalou coa súa familia. En 1962 regresou a España e despois de permanecer ata 1964 viaxou de novo a México para recolle-las súas posesións e instalarse definitivamente en Galicia.