Currículum

Ós trece anos comezou a traballar como tallista con ‘Saavedra Hermanos’ en Santiago de Compostela; estuda na Escola do Traballo co mestre Asorey, cursa solfexo e pinta ó óleo coa artista Elvira Santiso. Tres anos despois xa é oficial de segunda de talla ornamental en madeira. Entra en ‘Manufacturas Compostelanas’ e ós dezasete anos noméano oficial de primeira. Ó mesmo tempo estuda Artes e Oficios. En maio de 1949, marcha a Madrid para coñecer os importantes museos da capital. Instala o seu primeiro taller na Coruña e ós vintecinco anos decide ampliar estudos en Madrid, onde chega a ser profesor titular da Escola Maior de Arte. Ós doce anos deixa o profesorado e instala o seu taller en Madrid e en 1957 regresa á Coruña. Dedícase ós encargos e fai algunha exposición na Asociación de Artistas, expón con Seijo Rubio en Betanzos, etc. Traballa alternando o seu taller de Madrid co da Coruña. En 1963 noméano académico de número da Real Academia de Belas Artes, ocupando a praza do seu mestre Asorey. Posteriormente, con motivo da súa instalación en París, pásano a académico correspondente en 1975, gardándolle a praza de numerario. En 1964 vai vivir a París e busca un estudio, onde realiza obras excepcionais. As súas exposicións eran moi visitadas por personaxes ilustres. En Bélxica créase un ‘club de fans‘, que leva o seu nome. O 28 de xuño de 1982 expón en París con gran éxito, despois en Bucarest e en 1988 na Galería Antik & Kunt – Düsseldorf (Alemaña) e distintas capitais da Europa continental. En Düsseldorf (Alemaña) vive durante oito anos con taller propio e estuda o expresionismo en profundidade. En 1991 regresa á Coruña, reincorpórase á Academia de Belas Artes como académico de número.
En 1992 promove a exposición ‘Espacio Internacional- Carballo 92’.