Currículum

Era fillo de Manuel Díaz Lodeiro, natural dos Muíños, e de Encarnación Jácome Conde, de San Julián de Villaboa, en Asturias. A súa nenez transcorre polo barrio dos Muíños, onde estivo a piques de morrer cando foi collido pola roda dun muíño. En Mondoñedo aprende as primeiras letras na escola dos Muíños e vai entrar en contacto cos daquela alumnos do Seminario Aquilino Iglesia Alvariño, Xosé María Díaz Castro e con outros mindonienses como Álvaro Cunqueiro, Xosé Mª de la Fuente Bermúdez, Xosé Ramón Santeiro, Bernardino Vidarte, Raimundo Aguiar e outros. Participou con todos eles nas tertulias que había na barbería de O Pallarego, preto da Fontevella.
Dende moi novo interésase pola poesía e na cidade episcopal comeza a publicar os seus primeiros versos en diversos xornais locais como La Voz de Mondoñedo ou en Vallibria, e forma parte da chamada «Oficiña Lírica do Leste Galego», que tiña a sede no faio da casa de Cunqueiro, no número 26 da rúa Méndez Núñez, hoxe Álvaro Cunqueiro. Colaborou na revista Galiza que fundara Álvaro Cunqueiro con diversos artigos e poemas. Tamén colaborou nos xornais ribadenses La Comarca e Las Riberas del Eo, en El Progreso de Lugo, El Compostelano, na revista Resol.
Casou en Mondoñedo o vinte de novembro de 1939 coa súa conveciña Carmen García Losada, sendo testemuñas Jesús López Díaz e Ángel García Río. Este mesmo ano marcha para Pamplona. Aquí desempeñará a función de redactor xefe do xornal El Pensamiento de Navarra. Funda e dirixe nesta cidade as revistas Pregón, Albor e Cuadernos de poesía.
Xa no ano 1948 volve a Galicia e establecese en Vigo onde ocupa o cargo de redactor xefe do xornal Faro de Vigo. A comezos dos anos sesenta marcha para Oviedo onde traballará, ata a súa xubilación, como director de xornal La Voz de Asturias.
Hai tamén colaboracións súas en Alborada, do Centro Galego de Barcelona; en Numen e Cartel, de Vigo; en Atlántida de A Coruña; en Sonata Gallega, da cidade do Lérez; en Alba; en Mundo Gallego, de Madrid; en Papeles de Son Armadáns, de Palma de Mallorca; en Mundo Gallego e Airiños de Bos Aires; en O Gaiteiro de Lugo...
Colaborou en moitas publicacións editadas na súa cidade natal: programas de festas de As San Lucas, Festas dos Maios, nos xornais Mondoñedo, As San Lucas e Pregón Mindoniense, en Amencer, na revista Cuadernos del Museo Mindoniense, en Semblanza.Mondoñedo e non falemos de Mondoñedo. As San Lucas que se publicou cada ano desde outubro de 1964 ata ben entrada a década dos anos oitenta do pasado século do que foi fundador e alma mater.