Manuel Oreste Rodríguez López


Categoría: Escritor
Data de Nacemento: 11 de decembro de 1934 (†13 de febreiro de 1990)
Lugar de Nacemento: Randulfe - San Miguel de Paradela - Paradela (Lugo)

Manuel Rodríguez López. Emigrante Galego. Poeta Obreiro.
 Currículum

Fillo de emigrantes, residiu na emigración en Barcelona desde os seis anos ata 1987, data na que se afincou definitivamente na cidade de Lugo. Fixo estudios de Humanidades e Filosofía no Seminario Diocesano de Barcelona, e de Contabilidade e Lexislación Laboral. Foi xefe administrativo de 1ª do Departamento de Persoal dunha empresa siderometalúrxica, ata o peche da mesma en 1984. Manuel Rodríguez López colaborou asiduamente en medios informativos de Galicia, Cataluña e Arxentina. Publicou gran cantidade de artigos en diversos xornais e revistas de Bos Aires; en Coordenadas e Dorna; no Boletín, en Treboada e Alborada do Centro Galego de Barcelona, do cal foi Cronista Oficial. Foi correspondente de Faro de Vigo e de El Ideal Gallego na Cidade Condal, onde firmaba como MANUEL-ORESTE R. L., e habitual colaborador de El Progreso de Lugo, La Voz de Galicia e Praza Maior (voceiro do Concello de Lugo). Ademais, colaborou en temas de historia lucense, monumentalidade e viaxes en Radio Nacional de España en A Coruña e Radio Popular de Lugo.

 Obras realizadas

POESÍA: Poemas Populares Galegos (1968), Saudade no Bulleiro (1970), Soldada Minima (1979), Onte e Hoxe Vivencial (1995) e A Atlántida (1995), traducción ó galego do grande poema épico catalán de Jacint Verdaguer. PROSA: Reencontro coa Aldea (1983), Galegos en Catalunya 1978-1982 (1983), Galegos en Catalunya-2 (1985), Viaxes con Anxel Fole (1988), Festa da Virxe das Dores de Paradela 1989 (1989), libro-programa das festas e Volta a España a pé (1990), traducción ó galego do libro de Manolo Silva. Ademais, colaborou en diversos libros colectivos, entre os que se atopan Homaxe o Che (1970), A Nosa Terra (de "Libro de Oro", no centenario de Ramón Cabanillas) (1976), Homenaxe Multinacional a Castelao (1976), Galicia no Ano 1979 (1979), José Mª Acuña (1983), Os escritores lucenses arredor de FOLE (1986), Voces poéticas (1987), Paradela y su concello (1990) e Aliad-Ultreia. Poesía. Pintura (1993).

 Outros datos de interese

Manuel Rodríguez López acadou numerosos premios literarios, entre os que destacan os primeiros premios de poesía Meigas e Trasgos de Sarria nos anos 1976 e 1980 cos poemas “Ti es eterno" e "Neoplasia", respectivamente; o Premio Xosé Mª Chao Ledo no III Certame Literario de Vilalba, en 1977, con A Emigrante e o primeiro premio do Certame Literario de Begonte en 1985 coa obra Noite de Nadal. En prosa, coa peza teatral Vivimos unha longa traxedia conseguiu o primeiro premio Nós de Barcelona en 1980. En Sarria, mereceron o premio Meigas e Trasgos os seus contos A meiguiñameiga e os trasgos (1977) e Quen me dera atoparme co trasgo (1986) e, en Baracaldo, Baixa Voluntaria (1978). Nos Premios Galicia de Xornalismo, quedou finalista na sección de Reportaxe, nas convocatorias de 1985 e 1987. Co gallo do seu pasamento, foi nomeado "Fillo Predilecto do Concello de Paradela" e "Lucense do ano 1989". En 1990 inaugurouse a Casa de Cultura de Paradela "Manuel Rodríguez López" e, no ano 2001, o novo “Centro Sociocultural Manuel Rodríguez López”. Desde 1995, vense celebrando cada ano o Certame Literario Manuel Oreste Rodríguez López, organizado polo Concello de Paradela. Entre a bibliografía sobre Manuel Rodríguez López inclúense obras como Gran Enciclopedia Gallega, Medio cento de galegos e Rosalía, 88 gallegos: una tierra a través de sus gentes, De Pondal a Novoneyra, Diccionario de escritores en lingua galega,…. Suso Vaamonde, Xerardo Moscoso, Alfredo González e Mª Carmen Otero musicaron e cantaron varios dos seus poemas en numerosos recitais.