Justo Calviño Cruz

Categoría: Escritor
Data de Nacemento: 27 de maio de 1960
Lugar de Nacemento: Toén (Ourense)
 Currículum

Despois de estudar no Seminario Menor e no Instituto da Ponte, ingresa como funcionario na Tesourería Xeral da Seguridade Social e realiza estudos de Filoloxía Hispánica en Pontevedra, que deixa ó trasladarse a Mondoñedo á praza de xefe de negociado da U.R.E. desa localidade. Actualmente reside en San Lourenzo de Piñor – Barbadás (Ourense).

 Obras realizadas

Escritor bilingüe, foi finalista do Premio de poesía ‘Cidade de Ourense’ (1984) e do Certame de Contos ‘Casa da Xuventude’ (1985). Aparece, ademais, recollido na antoloxía de poetas ‘Galicia 1990’, editada en Ferrol. É autor dun anecdotario sobre ‘El Hospital Santo Cristo de Piñor y su relación con el pueblo, en los 50 primeros años de su existencia’ (1999), da primeira ‘Guía municipal de Barbadás’ (2000), do poemario ‘Poemas indómitos’ (2001), dun libro de narracións breves e poemas ‘Cousas da mala lúa’ (2002) e do libro de investigación ‘Barbadás, tradición y modernidad’ (2003). Esporadicamente colabora como articulista nos xornais ‘La Voz de Galicia’ e ‘La Región’.

 Outros datos de interese

Presidiu diversos colectivos veciñais e culturais como a Asociación de Veciños de Piñor e a Asociación Cultural ‘Frouma’. Así mesmo, desempeñou diversos cargos públicos: concelleiro de Cultura e Protección Civil de Barbadás, vogal na Comisión de Educación da Federación Galega de Municipios e Provincias e vogal na Comisión de Educación e Cultura da Federación Española de Municipios e Provincias. Na actualidade é coordinador cultural do Municipio de Barbadás, preside o Padroado da Banda e Escola de Música dese Concello, así como a Asociación de Música e Cultura de Galicia e tamén é directivo da Federación Galega de Bandas de Música Populares e dirixe a empresa ‘Cultura e Desenvolvemento Social, S.L.’, ademais de continuar exercendo a súa profesión de funcionario na Dirección Provincial da Tesourería da Seguridade Social de Ourense.