Currículum

Viviu na Coruña ata 2010, ano no que se trasladou a vivir ás Palmas de Gran Canaria. Comeza a súa andaina polo campo da pintura na adolescencia. Ós 14 anos comercializaba postais á acuarela e azulexos ó óleo. Tras estuda-lo bacharelato e Maxisterio, sacou as oposicións e exerceu o Maxisterio na Ensinanza Pública dende o ano 1963 ata a súa pre-xubilación voluntaria pola LOXSE. Tamén é diplomada en Belas Artes e licenciada en Filosofía e Pedagoxía. No ano 1961, o organismo competente Provincial do Ministerio de Educación, premia os seus debuxos didácticos referentes ó Ano Santo Mariano e con eles fai a súa primeira exposición na Coruña (no edificio ‘La Terraza’). O Ministerio de Educación e Ciencia outórgalle a especialidade didáctica en Debuxo e Plástica, que a autoriza a imparti-la docencia da especialidade. En 1970 cursa Belas Artes. En 1975 recibe clases do Académico e catedrático de Arte Tomás Barros, durante dous anos consecutivos. Neses anos afonda no impresionismo e expresionismo. Estuda técnicas de creatividade e expresión no ICE, Santiago de Compostela, durante tres anos consecutivos e en 1990 obtén o primeiro premio en Contos Infantís Ilustrados na Coruña. En 1995 ilustra a portada do libro ‘Carmen, Carmiña, Carmela’. Na actualidade traballa con diferentes técnicas: óleos, acrílicos e tintas. Colabora co encargado de Cultura do Sporting Club Casino, o recoñecido pintor internacional D. Gerardo Porto.