Currículum

Ós 10 anos comeza a súa afección pola música, xa se distinguía pola súa interpretación con frauta de pico. Pouco máis tarde comeza os seus primeiros estudios de Frauta de Pico, Traveseira e Piano no Conservatorio de Madrid e paralelamente no ámbito particular desenvolve os mesmos estudios na Academia "Clara" co concertista italiano "Juan Onetto". En Madrid forma parte de varios grupos musicais, entre os que destaca "Los chicos de la Turba", onde toca a frauta traveseira. En 1979 traslada a súa residencia a Galicia por motivos familiares, esto fai nacer nel unha nova paixón "a gaita galega", e neste ano comeza os estudios desta técnica e forma parte de grupos folk galegos como "Fiandón" de Lugo, co que consegue o "1º premio da Cantareliña". En 1983 forma parte dun trío tradicional acústico chamado "Los 3 de Galicia", con repertorio tradicional e popular, levando a súa música por múltiples pobos de Galicia. En 1985, e continuando os seus estudios, pasa a formar parte do grupo "Taranis" de Lugo, grupo folk patrocinado pola Deputación. Nel toca como solista a frauta traveseira, gaitas de distintas afinacións, Tin Whistles, punteiros e frautas de pico. En 1989 gravan un LP nos estudios "Sonoland" de Madrid. En 1991 forma parte doutro grupo lucense de folk "Brath", co que grava o LP Lembranza da Auga en Lisboa (Portugal). A súa actividade artística está alternada cos seus estudios profesionais e acaba a carreira superior de Frauta Clásica no Conservatorio Superior de Música de Santiago, co que consegue o título de Profesor Superior de Frauta Traveseira. Desde 1989 desenvolve actividades musicais variadas, dando a coñece-lo folclore galego por medio de asociacións culturais das que foi membro fundador como "Espalladoira" e "Zuncurrundullo". Dirixe tamén o grupo tradicional de gaitas "As Mariñas" de Cambre (A Coruña). A súa paixón pola gaita lévao a fomenta-las bandas de gaitas, fundamentalmente a través da "Liga Galega de Bandas de Gaitas", con máis de 125 bandas asistentes.