Currículum

Despois de facer o bacharelato en Padrón, estudou Enxeñería Técnica Agrícola na USC - Campus de Lugo (1979) e rematou a carreira cun proxecto titulado “Mellora do cultivo do Pemento de Padrón”.
Entre 1979 e 1980 dá clase no Colexio Rural Familiar “Dubra” de Negreira, no que Suso de Toro era o director. En 1981 é contratado pola empresa INYPSA para facer o primeiro catastro vitivinícola de Galicia para o INDO (antigo Instituto Nacional de Denominacións de Orixe do Ministerio de Agricultura). A finais de 1981 entra a formar parte do equipo directivo da Cooperativa Agraria Provincial da Coruña-LEYMA, onde traballa de responsable executivo do departamento de hortofloricultura.
Entre 1984 e 1990 foi elixido como Secretario do Colexio Oficial de Enxeñeiros Técnicos Agrícolas e Peritos Agrícolas da Coruña, Ourense e Pontevedra.
En 1987 entra na administración e desenvolve o seu labor como axente de extensión agraria en Carballo ata 1994, ano no que pasa a ser o responsable da sección de horticultura do Centro de Formación, Investigación e Tecnoloxía Agraria de Galicia en Santiago de Compostela.
En 2005 é nomeado Xefe do Servizo de Produción Agraria Sustentable e Sanidade Vexetal na Consellería do Medio Rural. Foi membro do Comité Fitosanitario Nacional, Comisión Nacional de Avaliación de Fitosanitarios e Comisión Nacional de Bioseguridade (2006-2009). Na Unión Europea formou parte do Committee on the Food Chain and Animal Health (2008-2009). É membro da Sociedade Española de Agricultura Ecolóxica e do Seminario de Técnicos e Especialistas en Horticultura. A súa actividade como experimentador e investigador desenvolveuse fundamentalmente no campo das brassicas, recuperación de castes hortícolas autóctonas e agricultura ecolóxica. Dirixiu varios traballos fin de carreira, publicou máis de vinte de traballos en revistas científicas e publicou tamén varios boletíns técnicos.