Obras realizadas

Participou en numerosos certames literarios nos que acadou numerosos premios, e era un habitual nos faladoiros de máis sona. A súa actividade cultural en Galicia foi intensa, constante e de gran calidade. A obra literaria é numerosa. Porén, como tal, en libro, nunca foi dada ao prelo. Podemos catalogala en dous bloques:

1)Poemas: odas, elexías e poemas de circunstancias e costumistas.

2)Teatro: Pilara ou Grandezas d'os humildes, fantasía dramática en tres partes, publicada en 1920. Non foi reimpresa desde entón. A súa estrea en Ferrol tivo un grande éxito.

Tamén foi fundador e profesor do Colexio Comellas de Ferrol (1877-1934). Nel estudaron, entre outros, Francisco Franco e Ricardo Carvalho Calero.

“Don Manuel Comellas Coimbra figura como autor dramático galego pola súa obra Pilara. Foi estreada no teatro Jofre de Ferrol o 23 de agosto de 1919, e novamente representada no mesmo teatro o 6 de setembro do mesmo ano. Imprentouse ao seguinte nos talleres de El Correo Gallego. É unha peza de ambiente mariñeiro, de desenrolo dramático, pero de desenlace fiz. Ten como segundo tíduo Grandezas dos humildes, i é evidente n-ela unha intención moral. O escritor non percuróu somente un fin artístico: quixo tamén dar unha lición de ética, e n-iste senso a súa obra cóntase antre as que constituien o teatro educativo. Contén unha apoloxía do carácter dos peixeiros e unha condenación do caciquismo. No primeiro aspeito o patrón Sidro e súa filla Isabel. A perseguizón da moza pol-o home da vila relaciónaa asimismo, co Lubicán, de Cotarelo”. (Carballo Calero R., Historia da literatura galega contemporánea, Galaxia, Vigo 1975, pp. 433-435).

“Alí acodimos os seus discípulos de entón, os seus discípulos de antano a escoitalo, silenzosos, no seu derradeiro viaxe”. Na lápida do seu fogar natal lese: “Bó ferrolán, bó periodista. Mestre de tres xeracións de estudantes”.

En Mandiá, na “Finca”, tiña árbores e plantas exóticas, importadas do Xapón e de moitos outros lugares. Era un excelente botánico. Chegou a ter unha grande fortuna. Utilizouna para causas benéficas e deixou parte da súa herdanza á Real Academia Galega. Foi condecorado pola Santa Sé, en 1901, polo papa León XIII. En 1905, publicou Catecismo Social, segundo as ensinanzas da Encíclica "RERUM Novarum" de León XIII. Era un fervente católico.