Currículum

Criouse nunha casa de labranza, e alí foi á escola, na que lle ensinaron o castelán. As súas primeiras vivencias foron no galego da aldea, que era una mestura de galego e castelán, á que máis tarde soubo que lle chamaban castrapo. Como todos os nenos, medrou inmerso nos costumes populares e aprendeu que a todos os seus ascendentes había que tratalos de vostede, e a toda persoa maior veciña ademais de tratala de vostede, antepúñaselle o Señor antes do nome. Ós nove anos incorpórase a Lugo para os estudos de bacharelato, pero seguirá vinculado á aldea en todas as vacacións escolares de inverno, primavera e verán ata os 19 anos, en que o destinaron a Pontevedra despois de aprobar unha oposición ó Corpo Técnico de Correos. Trasladado a Lugo ó ano seguinte, aquí discorrerá a súa vida con algunhas curtas ausencias por motivos profesionais, polo que seguirá relacionado coa aldea, onde disfrutou das súas reunións, foran estas de festas ou de traballos agrícolas: mallas, matanzas, esfolla do millo, pesca nocturna de anguias no caneiro, charlas no muiño ou no alpendre do zoqueiro. Interesáballe a conversa coas persoas maiores e así coñeceu a algunhas que estiveran na guerra de Cuba, outras que se foron á emigración e retornaran e outras que, incorporándose á aldea procedente de pobos próximos, traían aventuras que contar. Non pensaba el naqueles tempos de xuventude que da súa curiosidade de entón sacaría moitas anécdotas, refráns e adiviñas para a historia da aldea.